लघु उद्यम सम्बन्धी अध्ययन अवलोकन भ्रमण २०८०

विकासका लागि परिवर्तन चाहिन्छ तसर्थ विकास यथास्थितिमा आउने सकारात्मक परिवर्तन नै विकास को महत्वपूर्ण सूचक हो। देशको राजनीतिक, आर्थिक, भौतिक ,सामाजिक तथा सांस्कृतिक र मनोवैज्ञानिक आदि पक्षको सकारात्मक परिवर्तन विकास हो । कुनै पनि विकासका लागि प्रयाप्त पुँजी, श्रम शक्ति र प्राविधिक ज्ञान सिपको आवश्यकता पर्दछ । प्राविधिक ज्ञानसीप विना कुनै पनि विकासका पाईलाहरु अगाडी बढ्न सक्दैनन् ।

यस गाउँपालिका क्षेत्रभित्र महाभारत, चुरे साथै सिमशार लेकाली क्षेत्र रहेको हुँदा सो स्थान भित्र यस गाउँपालिकाले संचालन गर्ने सम्भावित अल्लो प्रशोधन उद्योग सञ्चालन गर्नको लागि आवश्यक पर्ने रेशाहरुमा अल्लो, भाँगो र भिमल जस्ता बोटविरुवाहरु प्रयाप्त रुपमा पाउन सकिन्छ । ति मध्ये अल्लो बनस्पतिको नरम मुना, पात, बोक्रा र जराका भागहरु निकै उपयोगी मानिन्छ । यसको काण्डको बोक्रा कपडा, डोरी तथा विभिन्न घरायसी सामग्री निर्माणका लागि प्रयोग गरिन्छ । यि र यस्तै खेर गई रहेका रेशादार बस्तुहरुको सदुपयोग तथा लघु उद्यम ब्यवसाय प्रवर्द्धन र स्थापना गर्नको लागि सम्भाव्यता अध्ययन अवलोकन गरी ज्ञान सीप हाँसिल गर्ने उद्देश्यले जोरायल गाउँ कार्यपालिकाका पदाधिकारीहरु १४ जना र यस जोरायल गाउँपालिकामा कार्यरत विभिन्न शाखाका ७ जना कर्मचारीहरु गरी २१ जनाको सहभागितामा मिति २०८० बैशाख १५ गतेदेखि १९ गतेसम्म लघु उद्यम सम्बन्धी अध्ययन अनुगमन भ्रमण तय गरेको थियो ।  साथै यस अनुगमन भ्रमणको अरु उद्देश्यहरुमा जोरायल गाउँपालिकामा अल्लो उद्योगको सम्भाव्यता अध्ययन गर्नु, अल्लो उद्योगबाट उत्पादित वस्तुको बजारिकरण सम्बन्धी जानकारी पाउनु, जोरायल गाउँपालिकामा रेन्बो ट्राउट माछापालन व्यवसायको सम्भाव्यता अध्ययन गर्नु, युवाहरुलाई रोजगारी सिर्जना गर्ने आधारहरुको पहिचान गर्नु, स्थानीय उत्पादनलाई प्राथमिकता दिने कुराको सम्भाव्यता अध्ययन गर्नु पनि रहेका छन ।

सोही उद्देश्य अनुरुप सो समय अवधिमा देशकै पर्यटकीय नगरि पोखरा महानगरपालिका- ८ मा रहेको ऋतु सौगात हेन्डी क्राफ्ट उद्योग, महिला क्षमता विकास कम्पनी प्रालिद्वारा संचालित अल्लो प्रशोधन उद्योग, दाङको घोराही उपमहानगरपालिका- १४ मा रहेको यूनिक दिदीबहिनी अल्लो उद्योग, चिनारी महिला साझेदारी अल्लो समुह र  माछापुछ्रे गाउँपालिका- २ भुर्जुङखोला, कास्कीको गण्डकी रेन्बो ट्राउट माछा फर्म आदीको अध्ययन तथा अवलोकन भ्रमण गरियो । यसका अतिरिक्त हाम्रो देश नेपालको आन्तरिक पर्यटन प्रवर्द्धन गर्नको साथै धर्म र संस्कृतिको उजागर गर्नको लागि तालबराही मन्दिर, फेवाताल  र मनकामना माताको दर्शन समेत गरियो ।  

समग्रमा हेर्दा अल्लो जन्य उत्पादित कच्चा पदार्थको यस जोरायल गाउँपलिकाका ६ वटै वडाहरुमा प्रयाप्त मात्रमा पाईने र सम्भाव्यता अध्ययन अवलोकन भ्रमणको क्रममा पनि बजारको प्रचुर सम्भावना रहेको हुँदा  लघु उद्यम अन्तर्गत अल्लो प्रशोधन तथा अल्लो बाट उत्पादित बस्तुहरु उत्पादन गरिने वस्तुहरु सहज र शुलभ रुपमा बजारिकरण गरि यस क्षेत्रमा रहेका गरिब विपन्न तथा पछाडी परेका समुदायहरुको आर्थिक वृद्धि गरि जिवनस्तर उकास्न महत्वपूर्ण भूमिका निर्वाह गर्न सक्छ ।

अन्तमा,

गाउँपालिकाले अल्लो उद्योग स्थापना तथा माछापालन जस्ता उद्यम व्यवसायहरुलाई प्राथमिकतामा राखी गाउँपालिकामा नै रहेको जनशक्ति परिचालन, स्रोतसाधन तथा कच्चा पदार्थहरु संकलन गरी बेरोजगार युवा युवतीहरुलाई उद्यमी बनाई रोजगारी सिर्जना मार्फत आर्थिक आयआर्जन वृद्धि गरिने छ ।

अल्लो उद्योग स्थापना मार्फत जोरायल गाउँपालिका अन्तर्गतका विभिन्न क्षेत्रहरुमा प्रशस्त मात्रामा पाइने अल्लोको सदुपयोग गरी व्यवसायीक बनाउन सके यस गाउँपालिकाको मौलिक उत्पादनको रुपमा देश तथा विदेशमा पठाउन सकिने तथा गाउँपालिकाको आन्तरिक राजश्व वृद्धि भई आर्थिक वृद्धि हाँसिल हुने भएकोले यसलाई आगामी आ.व.को नीति तथा कार्यक्रममा प्राथमिकताका साथ राखिने छ ।